İşğaldan azad edilmiş ərazilərimizdə həyata keçirilən irimiqyaslı bərpa və quruculuq işləri Azərbaycanın regionda formalaşdırdığı yeni iqtisadi və sosial inkişaf modelinin əsasını qoyur. Prezident İlham Əliyevin rəhbərliyi ilə həyata keçirilən Böyük Qayıdış proqramı çərçivəsində Cəbrayıl Şəhəri Günü ərəfəsində icra olunan infrastruktur layihələri ölkəmizin daxili potensialını və vətəndaşların rifahına yönəlmiş siyasətini nümayiş etdirir.

Milli Məclisin deputatı Kamal Cəfərov Cəbrayılın yenidən qurulması prosesini və bölgədəki hədəflərlə bağlı bildirib ki, qısa müddət ərzində reallaşdırılan layihələr regionun iqtisadi vəziyyətini ciddi şəkildə dəyişir:

“Vətən müharibəsi zamanı Cəbrayılın işğaldan azad edilməsi hərbi əməliyyatların gedişatında strateji dönüş nöqtəsi oldu və digər rayonlarımızın da azad edilməsi üçün geniş imkan yaratdı. Məlumdur ki, işğal dövründə düşmən bölgədə misli görünməmiş vandalizm aktları törədib, lakin bu gün dövlətimiz bu torpaqlara yenidən həyat verir. Cəbrayılda yaradılan “Araz Vadisi İqtisadi Zonası” Sənaye Parkı bütövlükdə regionun sənaye və logistika mərkəzinə çevrilməkdədir. Burada fəaliyyətə başlayan yerli və xarici müəssisələr, yaradılan minlərlə yeni iş yeri ölkəmizin qeyri-neft sektorunun inkişafına birbaşa töhfə verir”.

Deputat əlavə edib ki, Cəbrayılda təməli qoyulan yaşıl enerji təşəbbüsləri və beynəlxalq əhəmiyyətli nəqliyyat qovşaqları Azərbaycanın qlobal iqtisadiyyata inteqrasiyasını daha da sürətləndirəcək:

“Dövlətimiz azad edilmiş torpaqlarda müasir texnologiyalara əsaslanan ekoloji təmiz infrastruktur formalaşdırır. Cəbrayıl ərazisində inşa edilən günəş elektrik stansiyaları və yeni yarımstansiyalar bölgəni ölkəmizin əsas yaşıl enerji mərkəzlərindən birinə çevirir. Eyni zamanda Cəbrayıldan keçən beynəlxalq əhəmiyyətli avtomobil və dəmir yolları rayonun tranzit əhəmiyyətini artırır, beynəlxalq yükdaşımalar üçün yeni imkanlar açır, bu da öz növbəsində xarici investorlar üçün tamamilə yeni, rəqabətədavamlı biznes mühiti formalaşdırır.”

Kamal Cəfərov vətəndaşlarımızın öz doğma yurdlarına qayıtmasının, şəhərsalma tədbirlərinin və sosial siyasətin əhəmiyyəti barədə də fikirlərini bölüşüb:

“Bu gün müasir memarlıq üslubunda inşa edilən yaşayış kompleksləri, Böyük Mərcanlı, Şükürbəyli, Horovlu və digər kəndlərin ağıllı konsepsiya əsasında bərpası vətəndaşlarımızın yüksək həyat standartları ilə təmin olunmasına xidmət edir. Prezident İlham Əliyevin mütəmadi olaraq bölgəyə səfərlər etməsi, tarixi Xudafərin körpüsündə bayrağımızın ucaldılması bizim bu torpaqlara əbədi qayıdışımızın simvoludur. Azərbaycan sübut etdi ki, həm döyüş meydanında, həm də iqtisadi quruculuq sahəsində tarixi nailiyyətlər əldə etməyə qadir güclü bir dövlətdir”.